Psalms 32
Koakeil Methos Onen Ahi Hel en Keil, Isi Keil
1Sien hel en koakeil Ahi roleletei mun vatisa en keil ven tisaen one,en koakeil methos onen mul en keil.
2Sien hel en koakeil Ahi Asuv roselus kattei keil ven sakkalkalien one,
en koakeil luvosien tovuol en keil.
3Munak narvit lattei sakkalkalien onak,
namurang lisenges ka avek mai memerau veni.
4Meneai ka vongien,
kosan mahien minau.
Keihoen onak vuol ranau varei,
suval tilep vuol ka memes navong meteiai mutin keih.
5Sakini, navit lat tisaen keil onak minuk Ahi.
Sakkalkalien onak, nirmum lalautei mun.
Ka narendemi navit mahit lat tisaen keil onak minuk,
ka keik, kokulat keil ranau, ka methos onom hel eris enau.
6Hesakini, koakeil amusiluk ihis venuk en avong takeih keil.
Ka navong mahien hehi houlu hemai hehit vatahin koe keil, hesakras vasut keil.
7Keik kovi out tatokusien onak,
kikur koe nau en avong takeih.
Nisau masmasuk houlu mok,
ven koa koring koe moulien onak.
8Evus, Ahi Asuv mul viteni vit, “Nihiseinuk en sise koa nitie mal kovousili.
Nisan rendemien tahos minuk.
9Sakini konoumontei vatkeih onom nasuval hos tai,
koa aling aean tai en ongen vasakini vamah ka voual vamal en sise.”
10?Milesi? Meatin keil amum kalkali, mahien hehi houlu hemai en keil,
ka koakeil aling desien one en Ahi,
envatien onen mul kav koe keil.
11Kami koa mimum mal en meten Ahi, mihelonge hetahos ka mihevut kami.
!Kami koa milong kati, mihehisohiso en sien!
Copyright information for
PMA